Prezident rahbarligida 2022-yilning 18-iyul sanasida kengaytirilgan tarzda o‘tkazilgan videoselektor yig‘ilishida kadastr hujjati bo‘lmagan uy-joylarga yer solig‘i 3 karra miqdorda hisoblanayotgani, aholi tomorqa uchun kredit, subsidiya hamda uy-joyini kengaytirishga ipotekadan foydalana olmayotgani alohida taʼkidlanib o‘tildi. 

Masʼullarga kadastr hujjatiga ega bo‘lmagan, davlat ro‘yxatidan o‘tmagan yakka tartibdagi uy-joylarni xatlovdan o‘tkazish topshirig‘i berilgan edi. 

"Davlat kadastrlari palatasi viloyat boshqarmasining xabar berishicha, mazkur topshiriq ijrosini taʼminlash maqsadida kadastr xodimlari tomonidan xatlov ishlari olib borilmoqda. Aytish kerakki, hozirgi vaqtga kelib, kadastr xodimlari tomonidan avvaldan aholi tomonidan foydalanib kelayotgan yakka tartibdagi uy-joyga egalik huquqini tasdiqlovchi va kadastr hujjatiga ega bo‘lmagan hamda uy-joyga egalik huquqini eʼtirof etishga asos bo‘luvchi hujjatlarini birma-bir ko‘rib chiqish va maʼlumotlarni elektron bazaga kiritish ishlari davom etmoqda. Bugungacha viloyatimizning tuman, shahar hududlarida joylashgan 320 mingdan ziyod aholi xonadonlari ayni vaqtga qadar mahallabay tahlil qilib olinib, xatlovdan o‘tkazib bo‘lindi" deydi Davlat kadastrlari palatasi viloyat boshqarmasi boshlig‘i G‘ayrat Hamroyev. 

Xatlov ishlari 1-oktabrga qadar davom etadi.