Davlat kadastrlari palatasi Toshkent shahar boshqarmasi tomonidan o‘tgan yil davomida aholiga kadastr xizmatlarini ko‘rsatish ishlari samarali kechdi.
Xo‘sh, aholiga qanday xizmatlar ko‘rsatildi? Bu haqda boshqarma boshlig‘i Jasur Karimov quyidagilarni so‘zlab berdi.
– Faoliyatimizni “Xalq davlat idoralariga emas, davlat idoralari xalqimizga xizmat qilishi kerak” degan ezgu g‘oya asosida tashkil qilganmiz. Davlat kadastrlari palatasi Toshkent shahar boshqarmasi va uning hududiy filiallariga o‘tgan bir yildi ko‘chmas mulk obyektiga kadastr pasportini tayyorlash bo‘yicha jami 77 ming 613 ta ariza kelib tushdi. Shundan 52 ming 312 tasi ijobiy hal bo‘lgan, 24 ming 679 tasi rad etilgan va 622 ta ariza jarayonda.
Kadastr hujjatini tayyorlash bo‘yicha eng ko‘p buyurtma Sergeli tumani, eng kam buyurtma esa Yakkasaroy tumani aholisidan qabul qilingan.
Shuningdek, boshqarma tomonidan 29 ming 944 ta yakka tartibdagi turar joy, 14 ming 343 ta noturar joy ko‘chmas mulk obyektlari, 80 ming 559 ta ko‘p qavatli turar joylar hamda 292 ta yer uchastkasiga bo‘lgan huquqlar davlat ro‘yxatidan o‘tkazildi.
Ma’lumki, kadastr xalqimizga yaqin soha. Har kuni bo‘lmasa ham, kunora fuqarolarimiz u yoki bu masalada murojaat qilib kelishadi. Murojaatchiga mutaxassislar tomonidan shu joyning o‘zida huquqiy tushuntirish beriladi. Tuman filiallarimizda ham fuqarolar qabuli tashkil etilgan. Bundan tashqari tasdiqlangan reja-grafik asosida aholi va tadbirkorlarning kadastrga oid murojaatlari sayyor qabullar o‘tkazish orqali o‘rganilib, ularga yechim topilyapti.
O‘tgan yili boshqarmaga 8 ming 381 ta murojaat kelib tushgan bo‘lib, 4 ming 868 ta murojaat yuzasidan choralar ko‘rildi, 3 ming 472 ta murojaat muallifiga huquqiy tushuntirish berildi, 41 ta murojaat rad etildi.
So‘nggi yillarda ko‘chmas mulkka doir munosabatlarni tartibga solish va qonunchiligimizni mustahkamlash bo‘yicha bir qancha ishlar amalga oshirilmoqda. Xususan, 2022 yilning 28 noyabr kuni “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi qonun imzolandi.
Mazkur qonun ko‘chmas mulkka bo‘lgan huquqlarning davlat ro‘yxati sohasidagi munosabatlarini tartibga solish, bu bilan mulkdorlarning huquqlarini davlat tomonidan kafolatlash va himoya qilishni qonun darajasida amalga oshirishga xizmat qiladi.
Shuningdek, O‘zbekiston Respublikasi Vazirlar Mahkamasining 2022 yil 30 noyabrdagi 685-son qarori bilan qishloq xo‘jaligiga mo‘ljallanmagan yer uchastkalarini auksion savdolariga chiqarishning yangi tartibi joriy qilindi.
Unga ko‘ra, qurilish bo‘limlari bilan birgalikda kadastr organlari filiallari ham bo‘sh yer uchastkasini aniqlab, “Yerelektron” AATga kiritishi belgilandi.
Yer uchastkalarini savdoga chiqarishda kelishuv va muhokama jarayonlarini birlashtirish hisobiga kelishish bosqichlari 8 taga, auksionga chiqarish muddatlari esa 16 (ijara huquqida) va 22 ish kunigacha (mulk huquqida) qisqartirildi.
Jismoniy va yuridik shaxslarda doimiy foydalanishda (egalikda) bo‘lgan xususiylashtirilayotgan yer uchastkasini sotib olish qiymati hamma hududlar bo‘yicha yer solig‘ining bazaviy soliq stavkasi 20 baravari miqdorida belgilangan bo‘lsa, yangi tartibga muvofiq Toshkent, Nukus shaharlari va viloyat markazlarida yer solig‘ining bazaviy soliq stavkasi 10 baravarga, boshqa hududlarda 5 baravarga kamaytirildi.
Bir so‘z bilan aytganda, sohaga oid qonunchilikdagi yangiliklar fuqaro va tadbirkorlarga qo‘shimcha qulaylik yaratib bermoqda.
“Insonga e’tibor va sifatli ta’lim yili” deb nom berilgan 2023 yilda Davlat kadastrlari palatasi Toshkent shahar boshqarmasi va uning hududiy filiallari xodimlari yanada shijoat bilan faoliyat yuritishni maqsad qilgan. Xalqimizga yaqin bo‘lib, ularning sohaga oid murojaatlarini hal qilish, mushkullarini oson qilish yo‘lida bor kuch-imkoniyatni ishga solamiz.
