Kadastr agentligi Toshkent viloyati boshqarmasi tomonidan Yangiyo‘l tumanida olib borilgan nazorat tadbiri davomida qishloq xo‘jaligi yer maydonida kapital qurilish ishlari amalga oshirilganligi holati aniqlandi.
Aniqlanishicha, Yangiyo‘l tumani hokimining 2019-yildagi tegishli qarori asosida Tinchlik hududidagi qishloq xo‘jaligi haritasining 185-186-konturlaridan 9,7 gektar yer maydoni ijara huquqi asosida ajratilib, “Zamonaviy muqobil isitish tizimida ishlaydigan yengil tipdagi issiqxona, mevalarni quritish va saqlash omborxonasi” qurilishini loyihalashtirishga ruxsat berilgan.
Biroq, Yangiyo‘l tumani hokimi qarorlari belgilangan tartibda viloyat hokimi tomonidan tasdiqlanmasidan turib, yengil konstruksiyali qurilmalar qurilgan va oldi-sotdi shartnomasi asosida 5 nafar shaxslarga begonalashtirib yuborilgan.
Natijada bugungi kunda kapital qurilish ishlari amalga oshirilgan bo‘lib, qishloq xo‘jaligi ekin yer maydoni noqishloq xo‘jaligi toifasiga o‘tib ketishiga sabab bo‘lmoqda.
Holat yuzasidan Kadastr agentligi viloyat boshqarmasi tomonidan to‘plangan materiallar Qo‘shma tartib asosida prokuratura organlariga yuborilishi taʼminlandi.
