“Insonlarning dard-u tashvishlarini o‘ylab yashash odamiylikning eng oliy mezonidir”

O‘zbekiston Respublikasi Prezidenti, Shavkat Mirziyoyev

Davlat rahbarining el-yurtimiz qalbi va ongidan chuqur joy olgan bu so‘zlari bugun mamlakatimizda barcha soha va tarmoqlarda amalga oshirilayotgan tub o‘zgarish va islohotlarni harakatlantiruvchi qudratli kuchga, ta’bir joiz bo‘lsa, ularning g‘oyaviy o‘zagiga aylandi.

Kadastr agentligida “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni talablarini so‘zsiz va o‘z vaqtida bajarish asosiy vazifalaridan biri deb hisoblanadi. Xususan, aholi bilan doimiy muloqot qilish, ularni qiynayotgan muammolarni hal etish maqsadida joylarda uchrashuv va ochiq muloqotlarda o‘tkazish va kadastr sohasida aholi savodxonligini oshirish muhim ahamiyatga ega.

Nega deganda, odam ariza yoki shikoyat bilan murojaat qilmasa, bu unda umuman muammo yo‘q, degani emas. Ayniqsa, sabr-qanoat va shukronalikni hayot mazmuni, oriyat-u g‘ururni ulug‘ qadriyat darajasida e’zozlaydigan xalqimiz o‘rtasida dard-u tashvish qiynab turgan bo‘lsa-da, bu haqda mahalla-ko‘y, mutasaddi idora va tashkilotlarga murojaat qilishni o‘ziga ep ko‘rmaydigan, istihola qiladiganlar ko‘p. Shu bois ham davlatimiz rahbarining g‘oyasi va tashabbusi bilan mamlakatimizda xalq bilan muloqot qilish, murojaatlar bilan ishlash va aholi muammolarni hal etish sohasida yangi davrga qadam qo‘yilmoqda.

O‘zbekiston Respublikasi Iqtisodiyot va moliya vazirligi huzuridagi Kadastr agentligiga  2023-yil 1-iyul holatiga fuqaro va tadbirkorlardan jami 6 748 ta murojaatlar kelib tushgan. Kelib tushgan murojaatlarning 6 250 tasi ko‘rib chiqilgan bo‘lib, shundan 4 047 tasi yoki 64,8 foizi qanoatlantirilgan, 2 092 tasi yoki 33,5 foiziga huquqiy tushuntirish berilgan bo‘lsa, 111 tasi yoki 1,8 foiziga rad javobi berilgan.

Kelib tushgan murojaatlarni tahlil qiladigan bo‘lsak, Prezident virtual qabulxonasi orqali – 4 001 ta, Tadbirkorlar virtual ofisi orqali – 168 ta, Bosh Prokuratura orqali – 415 ta, Kasaba uyushmalari ishonch telefoni

orqali – 74 ta va Kadastr agentligiga bevosita jismoniy va yuridik shaxslar hamda boshqa vazirlik va idoralar orqali – 2 090 ta murojaatlar kelib tushgan.

Kadastr agentligi, hududiy boshqarmalar va tizim tashkilotlarida barcha idoraviy hujjatlar, murojaatlar, buyruqlar va boshqa ichki yozishmalar Elektron hujjat almashish avtomatlashtirilgan axborot tizimi orqali amalga oshirib kelinadi. Kelib tushgan murojaatlar yo‘nalishiga ko‘ra, Direktor va o‘rinbosarlar kesimida boshqarma va bo‘limlar tomonidan tezkorlik bilan ko‘rib chiqiladi.

Kadastr agentligi, tizim tashkilotlari, hududiy boshqarmalar va tuman (shahar) bo‘limlariga O‘zbekiston Respublikasi Prezidentining virtual qabulxonasi va Xalq qabulxonalari orqali yil boshidan jami 11 714 ta murojaatlar kelib tushgan.

Shuningdek, O‘zbekiston Respublikasi Prezidentining Virtual qabulxonasi va Xalq qabulxonasi orqali kelib tushgan murojaatlar tahlil qilinganda,

- Yer uchastkalari, bino va inshootlarga kadastr hujjatlarini tayyorlash – 5 279 ta

- Yer maydonini o‘zboshimcha egallab olish, noqonuniy qurilish – 1993 ta

- Yer maydoni ajratish (qishloq xo‘jaligi, tadbirkorlik) – 268 ta,

- Kadastr xodimlarining xatti-harakatlari yuzasidan – 1014 ta

- Kadastr ma’lumotlar bazasi bilan bog‘liq holatlar – 1014 ta

- Boshqa masalalar bo‘yicha esa – 1300 ta ekanligini ko‘rishimiz mumkin.

2023-yil davomida Kadastr agentligi hududiy boshqarmalariga jismoniy va yuridik shaxslarning murojaatlarini ko‘rib chiqishda rahbar va mas’ul xodimlar tomonidan kamchiliklar va qonunbuzarliklarga yo‘l qo‘yilganligi uchun javobgarlikka tortilish holatlari tahlil qilinganda, 2 ta lavozimdan ozod etish, 10 ta jarima va 82 ta hayfsan, jami 94 ta intizomiy jazo choralari qo‘llanilganligini ko‘rishimiz mumkin.

Kadastr agentligi rahbariyati Vazirlar Mahkamasi tomonidan tasdiqlangan grafikka muvofiq, o‘tgan davr mobaynida, Qashqadaryo, Jizzax, Buxoro, Xorazm, Namangan, Samarqand, Surxondaryo va Toshkent viloyatlarida sayyor qabullar tashkil etildi. Bunday sayyor qabullar orqali viloyatlarning chekka hududlaridagi fuqaro va tadbirkorlar bilan ishlash ustuvor vazifa etib belgilangan. Ushbu qabullarda, 270 dan ortiq fuqarolar ishtirok etgan bo‘lib, 218 nafar fuqaroning murojaati ijro uchun qabul qilindi. Qolgan fuqarolarga qabul davomida mutaxassislar tomonidan huquqiy ma’lumotlar berildi. Ijro uchun qabul qilingan murojaatlarning 35 foiz masalasi hal etilib, ijobiy ko‘rib chiqildi.

Joriy yilda, Kadastr agentligi hamda hududiy boshqarmalari tomonidan murojaatlarni ko‘rib chiqish natijalari bo‘yicha OAVlarda chiqishlar tashkil etildi. TV va radioda - 128 ta, gazeta va jurnallarda - 34 ta, Elektron OAVlarda - 280 ta, idoraning veb-sayti va ijtimoiy tarmoqlarida - 488 ta, jami – 958 ta chiqishlar qilingan.

Tizim tashkilotlari hamda hududiy boshqarmalardagi jismoniy va yuridik shaxslarning murojaatlari bilan ish olib boruvchi xodimlarni malakasini oshirish maqsadida Agentlik mas’ullari tomonidan 36 soatlik tashkiliy o‘qitish ish rejasi ishlab chiqildi hamda bugungi kunga qadar, jami 145 nafar xodimning malakasi oshirilib, yakuniy test natijalariga ko‘ra, malaka sertifikatlar berildi. Yil yakuniga qadar, yana 3 ta guruhda xodimlarning malakasi oshirish rejalashtirilgan.

Shu bilan birga, joylardagi tizimli muammolar va ularni yechimi bo‘yicha takliflar ishlab chiqish maqsadida Respublika va hududiy Xalq qabulxonalari bilan hamkorlik ishlari yo‘lga qo‘yildi.

FUQAROLAR MUROJAATI – DOIMO NAZORATDA

"Kadastr aholi manfaatlari yo‘lida" tamoyili asosida Kadastr xodimlari tomonidan fuqarolarning kadastr bilan bog‘liq muammolarini hal etish yuzasidan muntazam ravishda “Mahallabay”, “Xonadonbay” o‘rganish ishlari olib borilmoqda.

Shu o‘rinda aytib o‘tish joizki, Agentlik tomonidan aholi murojaatlarini qabul qilish uchun bir qator imkoniyatlar yaratilgan. Xususan, fuqaro va tadbirkorlar Kadastr agentligining 1097 “Ishonch telefoni”, kadastr.uz sayti, telegram ijtimoiy tarmog‘idagi kadastr_maslahatchi_bot orqali og‘zaki, yozma yoki elektron ko‘rinishda murojaatlarini yuborishlari mumkin. Ushbu murojaatlar hudud va toifasiga ajratilgan holda ijrochilarga tezkorlik bilan yetkaziladi va Qonunchilikda belgilangan muddatlarda ijrosi ta’minlab boriladi.

Men bugun ishonch bilan ayta olamanki,  Kadastr agentligi xodimlari har bir murojaat, qonunchilik hujjatlari va topshiriqlarning zamirida inson qadri yotishini his eta oladi. Kadastr agentligi jamoasi hukumatimiz tomonidan berilgan ishonchni oqlab, aholimizga o‘z vaqtida xizmat ko‘rsatish muhimligini to‘liq his etgan holda mazkur yo‘nalishda mustahkam ijro intizomini joriy qilish borasida muntazam ish olib boradi. 

Odil Maxmudov

Kadastr agentligi Tashkiliy nazorat va murojaatlar bilan ishlash boshqarmasi bosh mutaxassisi