Ijtimoiy tarmoqlarda "Auksion savdolarini tashkil etishda yo‘l qo‘yilayotgan xatoliklar aniqlanib, adliya aralashuvi bilan ijobiy yechim topilayapti" sarlavhasi ostida videolavha tarqaldi. Mazkur videolavhada Adliya masʼuli tomonidan bildirilgan fikrga qonuniy tuzatish kiritib o‘tsak.
Birinchidan
Qishloq xo‘jaligiga mo‘ljallangan yer uchastkalari onlayn auksion orqali sotilmaydi, balki elektron tanlov asosida maʼlum vaqtga foydalanish uchun ijaraga beriladi.
Ikkinchidan
2022 yil 24 avgustdagi 198-sonli Prezident farmoniga asosan fermer xo‘jaligi raisi o‘ziga tegishli bo‘lgan foydalanmayotgan yer uchastkasini zaxiraga qaytarish bo‘yicha notarial tartibda rozilik xati beradi. Xatirchi tuman hokimligining buyurtma xati va viloyat hokimligining zaxiraga qaytarish qaroriga asosan 254-konturdan jami 7 gektar yer maydoni shundan 6,8 gektar ekin yeri va 0,2 gektar boshqa yer maydonlari Davlat kadastrlari palatasining Navoiy viloyat boshqarmasi tomonidan Davlat reyestridan ko‘chirma shakllantirilgan.
Uchinchidan
Vazirlar Mahkamasining 2021 yil 24 noyabrdagi 709-sonli qaroriga asosan, qishloq xo‘jaligiga mo‘ljallangan yerlar Qishloq xo‘jaligi vazirligining O‘zdaverloyiha davlat ilmiy loyihalash instituti tomondan lotlarga bo‘lib dehqon xo‘jaligi sifatida “E-auksion.uz” elektron savdo platformasi orqali savdoga chiqarilishi belgilab qo‘yilgan. Kadastr idoralari bu jarayonda yerni auksionga qo‘ymaydi.
‼️ Eʼtibor bergan bo‘lsangiz bu jarayonda kadastr organining vazifasi hokimlikning zaxiraga qaytarish bo‘yicha arizasiga asosan davlat ro‘yxatidan o‘tkazishdan iborat. Bungacha bo‘lgan jarayonda kadastr organining aralashuvi yo‘q.
To‘rtinchidan
Biror bir masala yuzasidan maʼlumot(intervyu) berayotgan mutasaddi yoki mansabdor shaxslar avval masalaning tub mohiyatini anglashlari, huquqiy asoslarini o‘rganishlari va keyin so‘zga chiqishlari, ungacha esa o‘z bilimlari ustida ishlashi maqsadga muvofiq deb hisoblaymiz.
Ommaviy axborot vositalari orqali noto‘g‘ri axborot berish, qolaversa, Davlat idorasini noo‘rin holatda aybdor qilib qo‘rsatish aholimizda shu yo‘nalishga bo‘lgan norozilik kayfiyatini keltirib chiqaradi.
Bu esa aholining davlat tomonidan ushbu yo‘nalishlardagi ishlariga nisbatan ishonchsizlik kayfiyatini kelib chiqishiga sabab bo‘lishi mumkin.
