Kadastr agentligi Toshkent viloyati boshqarmasi tomonidan 2024-yilning o‘tgan 8 oyida jami 4 182 holatda 995,4 gektarda huquqbuzarlik holatlari aniqlangan, shundan 1 116 ta holatda yer qonunbuzilish holatlari joyining o‘zida bartaraf qilingan.
Tahlil natijalari esa joriy yilda huquqbuzarliklar soni o‘tgan yilga nisbatan ortganini ko‘rsatmoqda. Jumladan, Bo‘stonliq tumanida 161 taga, Zangiota tumanida 119 taga, Yangiyo‘l tumanida 140 taga ko‘p huquqbuzarlik holatlari aniqlangan.
Aniqlangan qonunbuzilishlar bo‘yicha 172 ta holatda to‘plangan materiallar prokuratura organlariga yuborildi, shundan, 115 ta holatda yer qonunbuzilish holatlarini sodir etgan shaxslarga nisbatan jinoyat ishi qo‘zg‘atilgan.
Yer maydonlarini o‘zboshimchalik bilan egallab olish va noqonuniy qurilmalar qurib olish holatlarini bartaraf etish yuzasidan 1 967 ta holatda yaʼni 134 gektar yer maydonidagi huquqbuzarliklar yuzasidan sudlarga daʼvo arizalari kiritilgan.
Shuningdek, yerlardan maqsadsiz foydalanish holati bo‘yicha jami 102 ta holatda 861 gektar aniqlangan. Holat bo‘yicha hokimliklarga taqdimnomalar kiritilib, shundan 80 ta holatda 805 gektar yer maydoni davlat zaxirasiga qaytarilishi taʼminlangan.
Shuni taʼkidlash joizki, ayni kunlarda “O‘zboshimchalik bilan egallab olingan yer uchastkalariga hamda ularda qurilgan binolar va inshootlarga egalik huquqini eʼtirof etish to‘g‘risida”gi O‘zbekiston Respublikasining 937-son Qonuni aholi orasida noto‘g‘ri talqin qilinib, yerga oid huquqbuzarliklarni qasddan sodir etilishiga olib kelmoqda. Qonun doirasida hujjatlarni rasmiylashtirib olish maqsadida yerlarni o‘zboshimcha egallash, noqonuniy qurilmalar qurish holatlari ayniqsa, poytaxtga yaqin hududlar, Zangiota, Yangiyo‘l, Qibray va Bo‘stonliq tumanlarida aniqlanmoqda.
Kadastr agentligi Toshkent viloyati boshqarmasi yer va kadastr nazorati shoʻbasi bosh mutaxassisi - Erkinjon Kamolov
