Davlatimiz rahbari raisligida 2022 yilning 18 iyul kuni o‘tkazilgan videoselektor yig‘ilishida kadastr hujjati bo‘lmagan uy-joylarga yer solig‘i uch karra miqdorida hisoblanayotganligi, aholi tomorqa uchun kredit, subsidiya hamda uy-joyni kengaytirishga ipotekadan foydalana olmayotgani alohida taʼkidlangan edi. Shu holatlarni inobatga olib masʼullarga kadastr hujjatiga ega bo‘lmagan, davlat ro‘yxatidan o‘tkazilmagan yakka tartibdagi uy-joylarni xatlovdan o‘tkazish topshirig‘i berildi.
Xatlov natijasida har bir tumandagi mavjud yer maydonlari va undan foydalanuvchilarning amaldagi hisobini aniqlash hamda tizimli yuritilishini yo‘lga qo‘yish, yer fondi toifasidan qatʼiy nazar har bir ko‘chmas mulk obyektiga nisbatan mavjud kadastr maʼlumotlarini aniq va to‘g‘ri shakllantirish va yuritilishini taʼminlash, raqamlashtirilmagan mulk obyektlari hisobini yuritish va o‘rnatilgan tartibda raqam berilishini tashkil etish, tuman yer resursi holatini o‘rganish, bo‘sh turgan, tadbirkorlik va shaharsozlik maqsadlari uchun berilishi mumkin bo‘lgan zaxiralarini aniqlash belgilangan.
Buxoro viloyatida ham mazkur belgilangan ishlar ijrosi doirasida keng ko‘lamli chora-tadbirlar amalga oshirilmoqda. Viloyatning har bir tumanida bo‘lgani kabi Jondorda ham kadastr xodimlari mahallalar kesimida xonadonma-xonadon yurib xatlov ishlarini o‘tkazmoqda.
–Tumanda 32 mingdan ziyod kadastr hujjati yo‘q xonadonlar mavjud, –deydi Davlat kadasrtlari palatasi Jondor tumani filial rahbari Jahongir Qo‘chqorov. – O‘tkazilayotgan xatlov ishlari natijasida bugungi kunga qadar 10 mingdan ortiq egalik huquqi yo‘q xonadonlar aniqlandi. Mazkur ko‘chmas mulklarga oid elektron maʼlumotlar UzKAD dasturiga kiritildi. Bundan tashqari, yil boshidan buyon Davlat xizmatlari markazi hamda Yagona interaktiv tizimi orqali ko‘chmas mulk obektlariga kadastr pasporti rasmiylashtirish uchun jami 1 ming 354 ta murojaatlar kelib tushgan. Murojaatlarga asosan, 706 ta yakka tartibdagi uy-joylarga, 188 ta ko‘p qavatli uydagi xonadonlarga, 415 ta noturar joy toifasidagi ko‘chmas mulk obyektlari va 45 ta yer uchastkalariga kadastr pasporti rasmiylashtirilgan.
Ayni kunlarda tumanda yer fondi toifasidan qatʼiy nazar har bir ko‘chmas mulk obyektiga nisbatan mavjud kadastr maʼlumotini aniq va to‘g‘ri shakllantirish, raqamlashtirilmagan ko‘chmas mulk obyektlari hisobini yuritish ishlari davom etmoqda.
Xatlov ishlariga kadastr muhandislari bilan bir qatorda tumanning 52 ta mahalla fuqarolar yig‘inlari raislari, profilaktika nozirlari hamda sektor rahbarlari ham biriktirilgan.
