So‘nggi yillarda fuqarolardan kelayotgan murojaatlarning aksariyatini uy-joyga bo‘lgan kadastr masalasi tashkil etmoqda. Ko‘pchilikning o‘zi istiqomat qilayotgan uy-joyi bo‘yicha zarur hujjatlari yo‘q.

Achinarlisi, murojaat qilib kelayotganlarning ko‘pchiligi davlatimiz rahbari tashabbusi bilan 2018-2019 yillarda o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha o‘tkazilgan bir martalik umumdavlat aksiyasida ishtirok etmagan.  

Shunday bo‘lsada “Inson qadri uchun” tamoyili asosida Buxoro viloyatining Shofirkon tumanida ham  aholining kadastrga oid muammoli masalalarini uzil-kesil hal qilish maqsadida barcha ko‘chmas mulk ob’ektlari birma-bir xatlovdan o‘tkazilmoqda.  

Xatlov jarayoni tumandagi 50 ta mahalla fuqarolar yig‘inidagi huquqiy hujjatlari bo‘lmagan 39 mingdan ziyod ko‘chmas mulk ob’ektlarining elektron hujjatlari shakllantirilib, UzKAD dasturiga yuklanmoqda. Shuning barobarida, xonadonma-xonadon o‘tkazilayotgan xatlovlarda huquqiy hujjatlari mavjud aholi vakillariga kadastr hujjatlarini shakllantirish bo‘yicha ham amaliy ko‘mak berilmoqda.  

– O‘zim yashab kelayotgan uy-joyga nisbatan mulk huquqini tasdiqlovchi hujjat yo‘qligi uchun bir necha yillardan buyon Kadastr hujjatlarini rasmiylashtira olmagan edim, – deydi tumanning Bog‘i Afzal mahallasida yashovchi 75 yoshli Anvarjon Amanov. – Yaqinda kadastr xodimlari uyimga kelib kadastr hujjatlarini rasmiylashtirib, davlat ro‘yxatidan o‘tkazishda amaliy yordam berishdi.  

Hozirgi kunga qadar Davlat kadastrlari palatasi Shofirkon tumani filiali tomonidan mulk huquqlari e’tirof etilgan 648 nafar turar joy egalarining kadastr pasportlari shakllantirilib berildi.