Kadastr agentligi Sirdaryo viloyati boshqarmasi Guliston shahar bo‘limi tomonidan o‘tkazilgan yer nazorati tadbirlari davomida joriy yilning 1 noyabr kuniga qadar 39 ta holatda 0.32 gektar yer maydoni o‘zboshimchalik bilan egallab olingani aniqlandi. Modomiki, bunday qonun buzilish holatlari hamon kuzatilayotgan ekan, ularning oldini olish maqsadida qanday ishlar amalga oshirilmoqda?
Ushbu savol bilan Kadastr agentligi Guliston shahar bo‘limi boshlig‘i Zarif Matmusayevga murojaat qildik.
– Yer va undan foydalanish tartiblari qonun bilan to‘liq tartibga solingan, – deydi Z.Matmusayev. – Biroq nazorat tadbirlari davomida ko‘ryapmizki, joylarda amaldagi tartiblarga ko‘r-ko‘rona munosabatda bo‘lish holati ham uchramoqda. Buning oldini olish uchun boshqarmamiz tomonidan doimiy nazorat ishlarini tashkil etish rejasi ishlab chiqildi. Unga muvofiq haftaning har dushanba kuni “Yer qonun buzilishlarining oldini olish va barvaqt aniqlash kuni” deb e’lon qilingan. Shu kuni sohada olib borilayotgan ishlar tahlil etilib, galdagi vazifalar belgilanmoqda. Bundan tashqari, mavzu doirasida o‘quv seminarlari ham tashkil etilib, xodimlarning malakasi oshirib borilmoqda.
Sohaga yangi yo‘nalishlarning joriy etilishi ishimizni yanada jadallashtirishga zamin yaratmoqda. Jumladan, Ma’muriy amaliyot yo‘nalishi orqali yilning o‘tgan davrida yer bilan bog‘liq qonun buzilishi holatlariga yo‘l qo‘ygan 142 nafar fuqaroga nisbatan ma’muriy huquqbuzarlik aniqlanib, ularning 111 nafariga 334 million so‘mdan ortiq miqdordagi jarima chorasi qo‘llanildi. Shuningdek, yuqoridagi qaror ijrosini ta’minlash maqsadida xalqaro standartlarga javob beradigan maxsus “E-yer nazorat” (ID) dasturi amaliyotga kiritildi. Uning asosiy maqsadi yerga aloqador qonun buzilish holatlarini sodir etgan shaxslar to‘g‘risidagi ma’lumotlar bazasini shakllantirishdan iboratdir.
Tegishli yer maydoni, joylashgan manzili, qachon va qaysi qonun buzilgani, ko‘rilgan choralar xususida sud, prokuratura, IIB, MIB va boshqa hamkor tashkilotlar bilan ma’lumotlar almashish imkoniyati yaratilib, hozirda ushbu dasturdan keng foydalanib kelinmoqda. Aytish joizki, bu boradagi muammolarni bartaraf etishda qonuniy targ‘ibot va tushuntirish ishlarining samarasi juda katta. Shu bois aholiga yerdan foydalanish tartiblari yuzasidan murojaatlar, ogohlantirishlar berish bilan bir qatorda tushuntirish ishlarini ham olib boryapmiz. Buning uchun OAV hamda ijtimoiy tarmoqlarda Kadastr agentligi Sirdaryo viloyati boshqarmasi tomonidan uzluksiz chiqishlar qilinmoqda. Hududlarda fuqarolar bilan uchrashuvlar tashkil etilib, ochiq muloqotlarda mavjud muammolar tahlil etilmoqda.
Qars ikki qo‘ldan chiqadi, deydilar. Yer bilan bog‘liq muammolarning oldini olishda, avvalo, fuqarolarning huquqiy bilimlarini shakllantirish maqsadga muvofiq. Agar yurtdoshlarimiz o‘z haq-huquqlari bilan bir qatorda burch va majburiyatlarini ham yaxshi anglashsa, yuqorida tilga olingan qonun buzilish holatlari yuz bermas edi.
