Korrupsiya – illat, undan ogoh bo‘ling!
Kadastr agentligi Namangan viloyati boshqarmasida Kadastr agentligi Komplaens-nazorat xizmati boshlig‘i Baxtiyor Shamansurov rahbarligida “Korrupsiya – illat, undan ogoh bo‘ling” mavzusida yig‘ilish bo‘lib o‘tdi.
Unda Kadastr agentligi hamda Davlat kadastrlari palatasining Namangan viloyati boshqarmalari rahbariyati, boshqarmalarning bo‘lim boshliqlari, mutaxassislari va inspektorlar ishtirok etdilar.
Tadbirda so‘z olgan Baxtiyor Shamansurov, Kadastr agentligi rahbariyati tomonidan korrupsion holatlarga keskin kurash eʼlon qilinganligi va barcha huquqbuzarliklar o‘rnatilgan tartibda huquqni muhofaza qilish idoralariga qonuniy chora ko‘rishlik uchun yuborilayotgani haqida yig‘ilganlarga axborot berdi.
Shuningdek xodimlarning huquqiy savodxonligini oshirish, kadastr hujjatlarni davlat ro‘yxatidan o‘tkazishda xatoliklarni oldini olish, sobiq xodimlar bilan ish yuzasidan aloqalarni kamaytirish, ustoz-shogird tizimida yuzaga kelgan nosog‘lom muhitni bartaraf etish, xodimlarni ishga olishdagi bir qator kamchiliklar, xizmat avtomashinalaridan foydalanishda yo‘l harakati xavfsizligi qoidalariga rioya qilish kabi dolzarb masalalar bo‘yicha o‘z fikrini bildirdi.
O‘zbekiston Respublikasining “Korrupsiyaga qarshi kurashish to‘g‘risida”gi, O‘zbekiston Respublikasining “Huquqbuzarliklar profilaktikasi to‘g‘risida”gi, “Davlat fuqarolik xizmati to‘g‘risida”gi qonunlari hamda O‘zbekiston Respublikasi Vazirlar Mahkamasining “Davlat fuqarolik xizmatchilari tomonidan odob-axloq qoidalariga rioya etilishini taʼminlash bo‘yicha qo‘shimcha chora-tadbirlar to‘g‘risida” 2022-yil 14-oktabrdagi 595-son qarorini mazmun-mohiyatini ochib berdi.
Yig‘ilishda so‘zga chiqqan Kadastr agentligi Namangan viloyat boshqarmasi Komplaens-nazorat xizmati bosh mutaxassisi M.Nurmatov tizimdagi bir qator muammolarga to‘xtalib kadastr hujjatlari bilan ishlashda yo‘l qo‘yilayotgan kamchiliklar, xodimlarning siyosiy va huquqiy ongini oshirish maqsadida, siyosiy hamda maʼnaviy-maʼrifiy ishlarni jonlantirish, yangi qabul qilinayotgan qonunlar, qaror hamda farmonlarni o‘rganish kabi ishlarni kuchaytirish lozimligini aytib o‘tdi.
Tadbirda xodimlar o‘zlarini qiziqtirgan savollarga batafsil javob oldilar.
