Ishonch telefoni : 1097 Kirish

Surxondaryoda 257,26 gektar yer o‘zboshimchalik bilan egallab olingan

30.11.2022
785

Mamlakatimizda so‘ngi yillarda yer maydonlaridan samarali foydalanish va ularning talon-taroj qilinishiga yo‘l qo‘ymaslik yuzasidan qat’iy choralar ko‘rilmoqda. O‘zboshimchalik bilan egallangan yerlar aniqlanib, o‘z holatiga qaytarilmoqda.

Prezidentimizning 2019 yil 17 iyundagi “Qishloq xo‘jaligida yer va suv resurslaridan samarali foydalanish chora-tadbirlari to‘g‘risida” gi hamda 2020 yil 7 sentyabrdagi “Yer hisobi va davlat kadastrlarini yuritish tizimini tubdan takomillashtirish chora-tadbirlari to‘g‘risida” gi farmonlari yer maydonlari xususan, sug‘oriladigan unumdor yerlardan oqilona foydalanishda muhim omil bo‘lmoqda. Shunga muvofiq, Surxondaryo viloyatida ham yer resurslaridan samarali foydalanish, muhofaza qilish va yer munosabatlari sohasida qonuniylikni ta’minlashga alohida e’tibor qaratilmoqda.

– Yer umummilliy boyligimiz, – deydi Kadastr agentligi Surxondaryo viloyati boshqarmasi boshlig‘i Menglimamat Abdirahmanov. – Boshqarmamiz va uning tuman, shahar bo‘limlari yer resurslarini talon-taroj qilish ya’ni, o‘zboshimchalik bilan egallab olishga chek qo‘yish yuzasidan keng ko‘lamli ishlar amalga oshirilmoqda. Jumladan, joriy yilning o‘tgan davrida viloyatda 804 holatda 257,26 gektar yer maydoni fuqarolar tomonidan o‘zboshimchalik bilan egallab olingani aniqlanib, tegishli hujjatlar rasmiylashtirildi. Har biriga ogohlantirish xatlari berildi. Zero, amaldagi qonunlarga ko‘ra, davlat mulki bo‘lgan yer farovon, to‘kin turmushimiz manbaidir. Undan oqilona foydalanish va o‘zboshimchalik bilan egallab olinishiga yo‘l qo‘ymaslik har birimizning fuqarolik burchimiz bo‘lishi lozim.

Kadastr agentligi Surxondaryo viloyati boshqarmasidan olingan ma’lumotlarga ko‘ra, yilning o‘tgan davrida 407 holatda 171,7 gektar o‘zboshimchalik bilan egallangan yer maydoni o‘z holiga qaytarilgan. 397 holatdagi 85,56 gektar yer maydonini avvalgi holiga qaytarish choralari ko‘rilib, 251 holatdagi 54 gektar yer maydoni bo‘yicha sudlarga davo arizasi kiritilgan. Sug‘oriladigan yerlarda noqonuniy qurilish ishlari olib borgani uchun 45 holatdagi 12,1 gektar yer maydoni bo‘yicha to‘plangan hujjatlar prokuraturaga o‘tkazilgan. Xususan, qonunga zid eng ko‘p yer maydonlari o‘zlashtirilgan Muzrabot tumanida 60 ta, Jarqo‘rg‘onda 45 ta, Termiz tumanida 48 ta va Sherobodda 42 ta holat bartaraf etilib, bebaho mulkimizni talon-taroj qilishga barham berilgan.

Yer munosabatlarida aniqlangan qonun buzilishlar yuzasidan Ma’muriy javobgarlik to‘g‘risidagi Kodeksning tegishli moddalariga asosan 2 ming 200 dan ortiq jismoniy va yuridik shaxsga 6 milliard so‘mdan ziyod jarima qo‘llanilib, hozirgacha uning ikki milliard so‘mdan ortig‘i undirib olingan.