Idoralararo imzolangan hamkorlik Bitimi doirasida tajriba almashish maqsadida Kadastr agentligi direktorining birinchi o‘rinbosari A. Allaberganov boshchiligidagi ishchi guruh joriy yilning 10–12-iyul kunlari Rossiya Federatsiyasining Saratov shahriga tashrif buyurdi.
Maʼlumot o‘rnida: 2021-yilning 22-iyun sanasida Moskva shahrida O‘zbekiston Respublikasi va Rossiya Federatsiyasi Hukumat rahbarlarining qo‘shma komissiyasi yig‘ilishi doirasida Kadastr agentligi va Rossiya Federatsiyasining Davlat ro‘yxatidan o‘tkazish, kadastr va kartografiya federal xizmati (Rosreestr) o‘rtasida geodeziya, kartografiya va kadastr sohalarida idoralararo hamkorlik Bitimi imzolangan.
Tashrif doirasida Rosreestr hamda «Roskadastr» davlat kompaniyasining Saratov oblasti hududiy filialiga tashrif buyurildi hamda masʼul rahbar va mutaxassislari bilan uchrashuvlar o‘tkazildi.
Kun tartibidan Rossiya Federatsiyasida yer nazorati, Huquqlar yagona davlat reestri (EGRN)ga kiritilgan maʼlumotlarning aniqligi, reestrdagi xatoliklar va maʼlumotlar yetishmovchiligi ustida ishlash amaliyoti, ko‘chmas mulk bilan bog‘liq “amnistiya”lar tajribasi borasida o‘zaro fikr va tajribalar almashinildi.
Uchrashuv yakuniga ko‘ra tomonlar navbatdagi idoralararo kengaytirilgan tartibdagi uchrashuv va uning kun tartibi borasida kelishib oldilar.
