Bugungi kunning eng dolzarb masalalaridan biri O‘zbekiston Respublikasi Prezidentining “O‘zbekiston Respublikasi Davlat soliq qo‘mitasi huzuridagi kadastr agentligi faoliyatini tashkil etish chora-tadbirlari to‘g‘risida” 2020-yilning 7-sentabrdagi PQ-4819-son qarori va “Yer munosabatlarida tenglik va shaffoflikni taʼminlash, yerga bo‘lgan huquqlarni ishonchli himoya qilish va ularni bozor aktivlariga aylantirish chora-tadbirlari to‘g‘risida” 2021-yil 8-iyundagi PF-6243-son Farmoniga asosan joriy etilayotgan yangi tizim va yer ajratish va undan foydalanish yuzasidan davlat nazorati, onlayn-auksion masalalari bo‘lib turibdi.
Maʼlumki, so‘ngi yillarda respublikamiz iqtisodiy sohasida keng ko‘lamli o‘zgarishlar yer va unga bog‘liq resurslarning aniq hisobini yuritish, ulardan oqilona foydalanish tizimini yana-da takomillashtirishni talab etmoqda.
Xususan, yerlarni ajratish, ularning hisobini yuritish, tadbirkorlik va shaharsozlik faoliyatini amalga oshirish uchun yer uchastkalarini berish mexanizmlarini tubdan takomillashtirish, shuningdek, tadbirkorlik subyektlari bilan o‘zaro munosabatlardagi byurokratik tartib-tamoyillar va to‘siqlarni qisqartirish bo‘yicha bir qator qaror va farmonlar qabul qilindi.
Joriy yilning 11-oktabr kuni Kadastr agentligining Komplayens-nazorat xizmati rahbari Baxtiyor Shomansurov, Davlat kadastrlari palatasi Komplayens-nazorat xizmati rahbari Sunnatilla Axmedov hamda Namangan tumani sudi sudiyasi Nargiza Sharipova bilan hamkorlikda Kadastr agentligining Namangan viloyat boshqarmasi va Davlat kadastrlari palatasi Namangan viloyat boshqarmasi rahbariyati ishtirokida boshqarmalar xodimlari uchun "Korrupsiyaga yo‘l qo‘ymaslik va uning oldini olish" mavzusida kengaytirilgan yig‘ilish bo‘lib o‘tdi. Unda tuman, shahar kadastr sohasi rahbarlari, bo‘lim boshliqlari, bosh mutaxassislar, operatorlar xodimlar qatnashdilar.
