Bugungi kunda barchamiz internet tarmoqlaridan axborot olishga o‘rganib qolganmiz. Ammo bu olayotgan axborotimiz qanchalik to‘g‘ri?
Baʼzi hollarda Ommaviy axborot vositalari vakillari yoki blogerlar korrupsiya holatini yuzaga keltirgan fuqarolarni amaldagi ish joyi, lavozimi to‘g‘risida jurnalistik surishtiruv ishlarini amalga oshirmasdan "bir tomonlama xulosa qilgan holda" xabarlar tarqatishmoqda.
Bu esa bir davlat idorasining mavqeini tushishi va millionlab xalqimiz orasida obro‘sizlanishiga sabab bo‘lmoqda.
Ming afsuski bunday holatlar so‘nggi paytlarda kadastr yo‘nalishi bo‘yicha ko‘p uchramoqda.
Masalan, maʼlum bir internet saytlar hamda ijtimoiy tarmoqlarda "Farg‘onada kadastr agentligi xodimi va sherigi qo‘lga olindi" nomli maqola eʼlon qilindi.
Aslida esa mazkur fuqarolar jinoyatni sodir etgan vaqtida agentlik xodimi hisoblanmagan, u bilan tuzilgan shartnomalari bir qancha muddat avval bekor qilingan bo‘lgan. Ammo bunga eʼtibor berilmasdan xabar tarqatilgan.
Afsuski bunga o‘xshagan bir qancha misollarni keltirishimiz mumkin!
Hurmatli jurnalist va blogerlar!
Biror idorani shaʼniga putur yetkazishi mumkin bo‘lgan axborotni tarqatishdan oldin albatta shu idora bilan bog‘lanib vaziyatga aniqlik kiritilsa ishga professional yondashilgan bo‘ladi.
Kadastr agentligi sizlar bilan yaqindan hamkorlik qilishga doimo tayyor ekanligini yana bir bor eslatib o‘tamiz.
Bizning sohamiz bo‘yicha biror-bir axborotga aniqlik kiritishga zarurat paydo bo‘lsa Kadastr agentligining 71-202-55-60, 71-202-55-81 yoki 1097 ishonch telefoniga qo‘ng‘iroq qilishingiz mumkin.
Ommaviy axborot vositalari, jurnalist va blogerlarga hurmat va minnatdorlik bildiramiz!
