“O‘zbekistonda Milliy fazoviy axborot salohiyatini kompleks mustahkamlash tizimini tashkil etish” grant loyihasi doirasida malaka oshirgan mutaxassislarni taqdirlash marosimi bo‘lib o‘tdi.
Koreya Respublikasi Yer, infratuzilma va transport vazirligi hamda Kadastr agentligi hamkorligida amalga oshirilayotgan “O‘zbekistonda Milliy fazoviy axborot salohiyatini kompleks mustahkamlash tizimini tashkil etish” grant loyihasi doirasida 5 bosqichli seminar-treninglar o‘z yakuniga yetdi.
Kadastr agentligi hamda uning tarkibiy tuzilmalaridan saralab olingan 31 nafar mutaxassisning 7 oy davomida koreyalik mutaxassislar tomonidan “GNSS o‘lchovi”, “Suratlarni qayta ishlash va ulardan foydalanish” hamda “Web-GIS” yo‘nalishlarida malakasi oshirilib, o’quv kurslarini muvaffaqiyatli yakunlaganliklari to’g’risidagi trenerlik sertifikatlari Koreya “Yer va fazoviy ma’lumotlarni axborotlashtirish korporatsiyasi” hamda “LX kosortsiumi” loyiha menejeri Li Jongmin va Agentlik rahbariyati ishtirokida topshirildi.
Trenerlik sertifikatiga ega mutaxassislar olgan bilim va tajribalari asosida Kadastr agentligi va uning tizim tashkilotlari xodimlarini, kadastr muhandislari va fazoviy ma’lumotlar infratuzilmasini yaratishga aloqador vazirlik va idoralar vakillarini qayta o’qitish va malakasini oshirishda instruktor sifatida ishtirok etishlari ko‘zda tutilgan.
Shuningdek joriy yilning 2-3-choragida Koreya tomonidan Agentlikning so’roviga ko'ra Q-GIS, LIDAR ishtirokida olingan tasvirlarni qayta ishlash va yer nazorati yo’nalishlarida navbatdagi o’quv seminarlar amalga oshirish rejalashtirilmoqda.
