Ishonch telefoni : 1097 Kirish

Fuqaro hamda tadbirkorlarga murojaat.

10.01.2023
785

Hurmatli fuqarolar va tadbirkorlar!!!

Bugun davlatimiz rahbari boshchiligida aholimiz turmush sharoitini yaxshilash va jamiyatimiz taraqqiyoti yo‘lida xizmat qiluvchi bir qancha qonunlar va qarorlar ishlab chiqilib amaliyotga tatbiq etilmoqda.

Shulardan biri korrupsiyaga qarshi murosasiz kurashish, qonun ustuvorligi va jazo muqarrarligini ta’minlashdir.

Kadastr sohasida ham ushbu yo‘nalishda tizimli ishlar amalga oshirilmoqda. Ammo biz bu bilan to‘xtab qolmoqchi emasmiz.

Korrupsiyaga qarshi kurashish qachon ta’sirchan bo‘lishi mumkin? Qachonki aholimizning huquqiy ongi va madaniyati rivojlanib, o‘zining haq-huquqlarini tanisa va talab qila olsa.

Kadastr sohasidagi ko‘plab tushunmovchilik va korrupsion holatlar aynan shuning oqibatida kelib chiqayotgani hech kimga sir emas.

Fuqarolarimiz orasida kadastr sohasi faqatgina yer uchastkasini ajratish bilan shug‘ullanadi degan noto‘g‘ri tushuncha hamon mavjud.

Vaholangki, amaldagi qonunlarimizga ko‘ra Kadastr agentligining yer ajratish bo‘yicha birorta vakolati mavjud emas.

Agentlik hamda uning tizimidagi tashkilotlar va hududiy boshqarmalar:

·   yerlarni o‘zboshimchalik bilan noqonuniy egallab olish holatlarini aniqlash va qonun doirasida belgilangan choralar ko‘rish;

·   huquqni tasdiqlovchi hujjati, ya’ni yer ajratish qarori, orderi yoki shunga o‘xshash asoslovchi hujjatlar bo‘lgandagina kadastr hujjatlarini rasmiylashtirish, ko‘chmas mulkka bo‘lgan huquqlarni davlat tomonidan qayd qilish ishlari bilan shug‘ullanadi.

Ma’lumot o‘rnida: bugungi kunda tadbirkorlik va boshqa maqsadlar uchun yer uchastkalarini elektron auksion orqali olish tartibi qonunan belgilab berilgan. Yer uchastkalarini hokimliklar tomonidan to‘g‘ridan-to‘g‘ri ajratish to‘xtatilgan.

Achinarlisi ayrim “uddaburonlar” odamlarning ishonchiga kirib, aldash yo‘li bilan hech qanday huquqiy hujjatlari bo‘lmasada yer uchastkasini sotaman yoki tanishlarim orqali  yer olib beraman, degan gaplar fuqarolarni chuv tushirishmoqda.

Hurmatli fuqarolar hamda tadbirkorlar agar Siz shunday vaziyatlarga duch kelib qolsangiz, hech qachon ishonmasligingizni va bunday hollarda huquqni muhofaza qilish organlari yoki Kadastr agentligining 1097 ishonch telefonlariga murojaat etishingizni so‘raymiz.  

Korrupsiyaga qarshi kurashish, aholimizni firibgarlardan himoya qilish barchamizning burchimizdir.

 

Kadastr agentligi direktori Farrux Pulatov