Bugun Davlat kadastrlari palatasida “Yerlarni xatlovdan o‘tkazish va geoportalga joylashtirish” jarayonlariga bag‘ishlangan press-tur o‘tkazildi.
Jurnalist va blogerlar, OAV vakillari hamda tashkilot mutaxassislaridan iborat ishtirokchilarning dastlabki manzili Toshkent viloyatidan, Toshkent shahriga o‘tkazilgan Bektemir tumani bo‘ldi. U yerda hududdagi masʼul palata xodimlari tomonidan amalga oshirilayotgan xatlov jarayonlariga qatnashchilar guvoh bo‘lishdi.
“Xatlov ishlari olib borilayotgan Bektemir tumanidagi ushbu mahallaga yangi nom berilishi bo‘yicha Xalq deputatlari tumani kengashiga taklif kiritilgan.
Bu mahallada 450 dan ortiq xonadon, 120 ta noturar joy obyektlari bor. Xonadonlarning 400 ga yaqini xatlov qilingan bo‘lib, qolganlari biz kunduz kuni kelganimizda ayrim uy egalari ishda bo‘lishadi. Shuning uchun xodimlarimiz shanba va yakshanba kunlari kelib ro‘yxatga olishadi.
Mahallaning hududi 546 gektarni tashkil etadi. Ishimizga qiyinchilik tug‘diradigan muammolar uyda hech kim bo‘lmasligi yoki yashovchining qo‘lidagi hujjatlar 80-90 yillardagi kolxoz qarorlari bilan istiqomat qilib kelishmoqda. Biz bu maʼlumotlarni rad qilmasdan ro‘yxatga kiritamiz. Hozirda Toshkent shahrida 100 dan ortiq yangi massivlarga nom berilgan bo‘lsada ko‘chalarimiz betartib bu bo‘yicha tuman komissiyalari ishlab kelmoqda”
— Davlat kadastrlari palatasi Toshkent shahar boshqarmasi boshlig‘i Jasurbek Karimov.
“Yer, ko‘chmas mulk bu O‘zbekiston xalqining hayoti, faoliyati va farovonligida eng muhim resurs hisoblanadi. Iqtisodiy sohadagi keng ko‘lamli o‘zgarishlar kadastr sohasini ham yana-da takomillashtirishni talab etmoqda.
Bizning asosiy vazifamiz har bir yer uchastkalarini ko‘chmas mulk obyektlarini hisobga olish va unga bo‘lgan huquqlarni davlat ro‘yxatidan o‘tkazishdan iborat.
Yangi tizimda 300 mingdan ortiq yer uchastkalari haqida maʼlumotlar kiritilib unga bo‘lgan huquqlar davlat ro‘yxatidan o‘tkazildi. Yangi yaratilgan elektron tizimning eʼtiborli jihati shundaki, masalan avvallari yer uchastkasini maydonlarini hisoblashda qog‘oz ko‘rinishidagi xaritalardan foydalangan va unga bo‘lgan huquqni davlat ro‘yxatidan o‘tkazilishi temir kitobda yuritilib kelingan. Tizimda yer uchastkalarini barcha maʼlumotlari shu qatorda yer chegaralari konturlari joylashishi barchasi raqamlashtirilgan va huquqiy hujjatlarga mutanosibligi yagona tizimda joriy etildi.
Shuningdek, yer hisobini yuritilishi - huquqlarni davlat ro‘yxatidan o‘tkazish ishlari amalga oshirilishi, yer munosabatlari sohasidan ijtimoiy barqarorlikni o‘rnatishda, korrupsion holatlarni oldini olish, qonun ustuvorligini taʼminlashda shaffof tizim sifatida xizmat qiladi"
— Davlat kadastrlari palatasi yer kadastrini yuritish bo‘limi boshlig‘i Faxriddin Niyozov.
Tushdan keyin Davlat kadastrlari palatasida matbuot anjumani bo‘lib o‘tdi. Ommaviy axborot vositalari vakillari unda yer xatlovidan so‘ng bosqich bo‘yicha geoportalga kirgizish va yer fondi turlari, yangi elektron tizim jahon banki loyihasi doirasida yaratilgani hamda geoportalni shakllantirish bo‘yicha qaysi rivojlangan mamlakatlar tajribasi qo‘llanilayotganligi haqida maʼlumotlarga ega bo‘ldilar.
