💠2022-yil 5-aprel kuni Oliy Majlis Qonunchilik palatasining Agrar va suv xo‘jaligi masalalari qo‘mitasi tomonidan o‘tkazilgan Ishchi guruhi yig‘ilishida “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi qonun loyihasi muhokama qilindi.

Qonun loyihasida sohaga oid tushunchalar, vakolatli organlar, ko‘chmas mulkka bo‘lgan huquqlarni ro‘yxatdan o‘tkazish, maʼlumotlar taqdim etish tartibi, ko‘chmas mulkka bo‘lgan huquqlarni ro‘yxatdan o‘tkazishni tashkil etish, nizolarni sudgacha hal etish kabi bir qator normalar o‘z aksini topmoqda. Shuningdek, ko‘chmas mulkka bo‘lgan huquqlar davlat reyestri, ro‘yxatdan o‘tkazish ishini va biznes jarayonlarni elektron shaklda axborot tizimlari orqali yuritish belgilanmoqda.

Taʼkidlash joiz, deputatlar qonun loyihasini ikkinchi o‘qishga tayyorlash jarayonida ko‘chmas mulkka bo‘lgan huquqlarni davlat ro‘yxatidan o‘tkazish sohasidagi mavjud tartibotlar, huquqni belgilovchi hujjatlar, jarayonlarning xususiyatlarini umumlashtirib, yagona to‘g‘ridan-to‘g‘ri amal qiluvchi qonun shakliga keltirishga alohida eʼtibor qaratmoqda.

Ishchi guruhi yig‘ilishida vakolatli organlar qarori asosida ko‘chmas mulkka taqiq qo‘yilganda, bu haqda huquq egalarini xabardor qilish, ayniqsa, yuzaga keladigan nizolarni sudgacha hal qilish mexanizmini loyihada aks ettirish ham deputatlar diqqat markazida bo‘ldi.

Yig‘ilishda shuningdek, loyihadagi ko‘chmas mulkka bo‘lgan huquqlarni davlat ro‘yxatidan o‘tkazish bilan bog‘lik norma deputatlar bergan takliflar asosida takomillashtirildi.

Qonun loyihasini maromiga yetkazish ishlari davom etmoqda.