Kuni kecha ijtimoiy tarmoqlar orqali tarqalgan va muhokamalarga sabab bo‘layotgan “Buxoroda madaniy meros ob’ekti auksion savdoga chiqarilgani aniqlandi” sarlavhasi ostida maqola e’lon qilindi. (https://kun.uz/news/2022/02/07/buxoroda-madaniy-meros-obekti-auksion-savdoga-chiqarilgani-aniqlandi)
Ushbu holat yuzasidan quyidagi aniq ma’lumotlarni taqdim qilamiz:
Davlat kadastrlari palatasi Buxoro tuman filiali tomonidan o‘tkazilgan xatlov natijasida 2021-yil 21 sentyabrda Buxoro tumani, “Shergiron” MFY hududidan 0,108 gektar bo‘sh yer uchastkasi aniqlanib, 6 ta lotga (0,018 gektardan) bo‘lgan holda auksion savdolariga chiqarish taklifi bilan amaldagi tartib asosida tegishli tashkilotlar bilan kelishish (xulosa olish) uchun elektron tizimga yuklangan (“Yerelektron” avtomatlashtirilgan axborot tizimi).
Tizimda mas’ul organlar vakolati doirasida bo‘sh yer uchastkasini auksionga chiqarish yuzasidan xulosalarini beradi. Masalan, qurilish boshqarmalari – taklif qilinayotgan yerda qurilish qilish mumkin yoki yo‘qligi haqida, tabiatni muhofaza qilish qo‘mitasi – tabiatga zarar yetkazilishi bo‘yicha, hududiy madaniy meros boshqarmalari – taklif qilinayotgan yer maydoni madaniy meros ob’ekti yoki himoya hududiga tegishliligi yoki tegishli emasligi, madaniy merosga zarar yetmasligi, auksionga chiqarish mumkin yoki mumkin emasligi to‘g‘risida o‘z xulosasi bilan kelishuvni amalga oshiradi (10 ga yaqin mas’ul idoralar xulosalar beradi).
Bunda, kadastr idoralarining vakolati bo‘sh yer maydonini kelishi uchun elektron dasturga yuklashdan iborat hisoblanadi.
Vazirlar Mahkamasi tomonidan belgilangan tartibga ko‘ra elektron dastur orqali qurilish organlarining ijobiy xulosasi olingandan so‘ng, besh ish kuni ichida O‘zbekiston Respublikasi Madaniyat vazirligi huzuridagi Madaniy meros departamenti Qoraqalpog‘iston Respublikasi, viloyatlar va Toshkent shahar madaniy meros boshqarmalari materiallarni kelishishi yoki kelishishni rad etishi ko‘rsatilgan.
Buxoro tuman qurilish bo‘limi tomonidan 2021 yil 6 sentyabrda Buxoro tumani “Shergiron” MFY hududidan kelishish uchun yuborilgan 6 ta bo‘sh yer uchastkalarini auksionga chiqarilishi mumkinligi elektron tizimda Buxoro viloyat madaniy meros boshqarmasi tomonidan kelishib, elektron raqamli imzo bilan tasdiqlangan!
Eslatma: tizimda kelishuv jarayonidagi har bir harakat hamda xulosalarning elektron arxivi shakllanib boradi, qaysi idora qachon, qanday xulosa berganligi, kelishuvdagi munosabati elektron tizimda saqlab boriladi.
Bundan tashqari ushbu taklif etilgan bo‘sh yer uchastkalar Buxoro viloyat Qurilish bosh boshqarmasi huzuridagi arxitektura-shaharsozlik Kengashi bayonnomasiga asosan kelishilgan va e’tirozlar bo‘lmaganligi sababli, 2021 yil 2 va 9 noyabrda belgilangan tartibga ko‘ra, kelishuv ijobiy yakunlangan deb topilib, elektron tizim orqali avtomat ravishda auksion savdolariga chiqarilgan.
Ma’lumot uchun: Kengash tarkibiga 18 ta mas’ul idora vakillari, xususan Madaniy meros ob’ektlarini muhofaza qilish va ulardan foydalanish ilmiy ishlab chiqarish bosh boshqarmasi mas’ullari ham kiritilgan.
Yer uchastkalari auksion savdolariga chiqarilgandan so‘ng, 70 kundan keyin (2022 yil 7 yanvarda) mazkur yer maydoni Davlat muhofazasiga olingan “Chor bakr” me’moriy majmuasi muhofaza hududida joylashgani to‘g‘risida Buxoro viloyat Madaniy meros boshqarmasi tomonidan xat yo‘llagan.
Vaholangki, auksion savdolariga chiqarilgan 6 ta lotdan 2 tasi 2021 yil 28 dekabr kuni ijara huquqi asosida sotilgan bo‘lgan.
Aslida, bunday harakatlar bir necha oy oldin yer maydoni auksionga chiqqunga qadar amalga oshirilishi elektron dasturda Madaniy meros boshqarmasining mas’uli orqali kelishib berilmasdan rad etilishi kerak edi.
Buxoro viloyat Madaniy meros boshqarmasining 2022 yil 7 yanvardagi xati asosida Davlat kadastrlari palatasi Buxoro viloyat boshqarmasi tomonidan 2022 yil 12 yanvarda yuqori turuvchi tashkilotiga (Davlat kadastrlari palatasiga) murojaat yo‘llangan va Palata tomonidan o‘z navbatida taqdim etilgan ma’lumotlar hamda elektron tizimdagi auksion kelishuvi jarayonlaridagi xulosalar (kelishuvlar) o‘rganib chiqilgan.
O‘rganish natijasi bo‘yicha, auksion savdolariga chiqarilgan 6 ta (0,108 gektar) lotni savdo maydonchasidan qaytarib olish yuzasidan 2022 yil 17 yanvarda Kadastr agentligi murojaat yo‘llangan.
Biroq, 6 ta lotdan 2 tasi bo‘yicha 2021 yil 28 dekabrda, 4 tasi bo‘yicha esa 2022 yil 17 yanvarda auksion savdolari o‘tkazilib, ijara huquqi asosida sotilgan.
Yuqoridagi holatlar yuzasidan Madaniy meros rasmiy munosabatida huquqni muhofaza kiluvchi organlar tomonidan o‘rganish ishlari olib borilayotgani ta’kidlangan. O‘rganish natijalari bo‘yicha ko‘shimcha axborot takdim etilishini ma’lum qilamiz.
