Samarqand shahrini 1 mln aholi yashaydigan yirik shaharga aylantirish uchun 18 ming gektar yer maydoni qo‘shib beriladi.

Samarqand shahri hududi 18 ming gektarga kengaytirilib, u yerda 5 ta tuman tashkil etiladi. Bu haqida 2021 yil 23 noyabrdagi Samarqand shahar Xalq deputatlari kengashining 45- sessiyasida maʼlum qilingan edi.

Aholi soni bir milliondan ortiq bo‘lgan yangi shahar hududida Qorasuv, Siyob, So‘g‘diyona, Bog‘ishamol va Maroqand tumanlari tashkil etiladi.

O‘zbekiston prezidenti Shavkat Mirziyoyev Samarqand shahri Pastdarg‘om, Toyloq va Oqdaryo tumanlari hisobiga 18 ming gektarga kengayish rejasi haqida xabar qilgan edi.

Samarqand shahar hududini 5 ta tumanga bo‘lish rejalashtirilmoqda:

- Qorasuv tumani - maydoni 7,921 ming gektari, MFYlar soni 33 ta, aholi soni 134,7 ming kishi;

- Siyob tumani - maydoni 4,846 ming gektari, MFYlar soni 100 ta, aholi soni 301,3 ming kishi;

- So‘g‘diyona tumani - maydoni 3,741 ming gektari, MFYlar soni 54 ta, aholi soni 184,9 ming kishi;

- Bog‘ishamol tumani - maydoni 3,246 ming gektari, MFYlar soni 55 ta, aholi soni 170,5 ming kishi;

- Maroqand tumani - maydoni 8,333 ming gektari, MFYlar soni 51 ta, aholi soni 226,6 ming kishi.

Oliy Majlis Senatining “Samarqand viloyatining Oqdaryo, Past Darg‘om, Samarqand, Toyloq tumanlari va Samarqand shahri mavjud maʼmuriy-hududiy chegaralarini o‘zgartirish, Samarqand shahri tarkibida Qorasuv, So‘g‘diyona, Siyob, Bog‘ishamol, Maroqand tumanlarini tashkil qilish hamda Samarqand tumanini tugatish to‘g‘risida”gi qarori loyihasi eʼlon qilindi.

Vazirlar Mahkamasining taklifi qabul qilinib:

Samarqand viloyatining Oqdaryo, Past Darg‘om, Samarqand, Toyloq tumanlari va Samarqand shahri maʼmuriy-hududiy chegaralari o‘zgartiriladi:

Samarqand viloyati Oqdaryo tumanidan 1 654 gektar, Samarqand tumanidan 12 975 gektar, Past Darg‘om tumanidan 1 245 gektar, Toyloq tumanidan 1 269 gektar yer maydonlari Samarqand shahri tarkibiga;

Samarqand shahridan 528 gektar, Samarqand tumanidan 1370 gektar yer maydonlari Past Darg‘om tumani tarkibiga;

Samarqand tumanidan 29 283 gektar yer maydoni Toyloq tumani tarkibiga o‘tkaziladi.

Samarqand tumani alohida maʼmuriy-hududiy birlik sifatida tugatiladi.

Umumiy yer maydoni 28 415 gektar bo‘lgan Samarqand shahri tarkibida umumiy yer maydoni 8 250 gektar bo‘lgan Qorasuv tumani, umumiy yer maydoni 3 741 gektar bo‘lgan So‘g‘diyona tumani, umumiy yer maydoni 4 846 gektar bo‘lgan Siyob tumani, umumiy yer maydoni 3 246 gektar bo‘lgan Bog‘ishamol tumani, umumiy yer maydoni 8 333 gektar bo‘lgan Maroqand tumani tashkil etiladi.

Samarqand viloyati Samarqand shahar chegarasining tavsifi va chizmasi, Samarqand shahri tarkibida tashkil etilgan Qorasuv, So‘g‘diyona, Siyob, Bog‘ishamol va Maroqand tumanlari chegarasining tavsifi va chizmasi, Samarqand viloyatining Oqdaryo, Samarqand, Past Darg‘om, Toyloq tumanlari hududidan Samarqand shahar hududiga o‘tkazilayotgan yer maydoni chegaralarining tavsifi va chizmasi, Samarqand shahri va Samarqand tumanidan Past Darg‘om tumani tarkibiga o‘tkaziladigan yerlar chegarasining tavsifi va chizmasi, Samarqand tumanidan Toyloq tumani tarkibiga o‘tkaziladigan yerlar chegarasining tavsifi va chizmasi tasdiqlanadi.

Yangi tashkil etilgan Maroqand tumani tarkibidagi Gulobod massivi Samarqand viloyatining maʼmuriy markazi etib belgilanadi.