Andijon viloyat Kadastr agentligi, uning tuman, shahar bo‘limlari tomonidan kadastr sohasiga oid qonun, farmon va qarorlar ijrosini ta’minlash, tizimda olib borilayotgan ishlar samaradorligini oshirish bo‘yicha belgilangan ishlar olib borilmoqda.
Viloyatda yerdan foydalanish, muhofaza qilish, ayniqsa, qishloq xo‘jaligi yerlaridan oqilona va samarali foydalanishni targ‘ib etishga qaratilgan keng ko‘lamli targ‘ibot ishlari olib borilmoqda. Biroq, viloyatda yerdan noqonuniy foydalanish, yerlarni o‘zboshimchalik bilan egallab olish holatlari aniqlanmoqda.
Kadastr agentligining Andijon viloyati boshqarmasi tizimida faoliyat olib borayotgan inspektorlar tomonidan o‘tkazilgan o‘rganishlar natijasida joriy yilning o‘tgan olti oyi davomida 500 ta holatda 46,1 gektar yer maydoni o‘zboshimchalik bilan egallab olinganligi aniqlandi.
Tahlillarga ko‘ra, o‘zboshimchalik bilan egallab olingan 46,1 gektar yer maydonining 38,6 gektari qishloq xo‘jaligiga, 2,8 gektari aholi punktlariga, 1,5 gektari suv fondi, 1,8 gektari zaxira yer fondiga, qolgan qismi esa sanoat, transport, aloqa, mudofaa, tarixiy-madaniy ahamiyatga molik ob’ektlarga tegishli ekanligi ma’lum bo‘ldi.
– Hududiy kadastr inspektorlarimiz tomonidan olib borilgan targ‘ibot tadbirlari natijasida 14,5 gektar yer bilan bog‘liq qonun buzilish holati fuqarolar tomonidan ixtiyoriy ravishda bartaraf etildi, – deydi Kadastr agentligi Andijon viloyat boshqarmasi boshlig‘i Fayoziddin Berdiqulov. – Shuningdek, 26,7 gektar yer maydonidagi noqonuniy qurilgan qurilmalarni buzdirish yuzasidan Fuqarolik ishlari bo‘yicha sudlarga da’vo arizalar kiritildi. Bundan tashqari, 61 ta holatda aniqlangan qonun buzilish holatlarida jinoyat alomatlari mavjudligi sabab holatga huquqiy baho berish uchun tegishli hujjatlar prokuratura organlariga taqdim etildi.
Hududiy kadastr inspektorlari tomonidan yuridik va jismoniy shaxslar o‘rtasida joriy yil aprel oyida qabul qilingan “Ma’muriy jarimalarni to‘lashda aholiga qo‘shimcha qulayliklar yaratilishi munosabati bilan O‘zbekiston Respublikasi ma’muriy javobgarlik to‘g‘risidagi kodeksining 3321-moddasiga o‘zgartish kiritish haqida”gi O‘zbekiston Respublikasi Qonuni, qonundagi afzalliklar bo‘yicha targ‘ibot va tushuntirishlar olib borilmoqda. Ya’ni, huquqbuzar unga jarima solish to‘g‘risidagi qaror topshirilgan kundan boshlab o‘n besh kun ichida jarima miqdorining ellik foizini yoki o‘ttiz kun ichida jarima miqdorining yetmish foizini ixtiyoriy ravishda to‘lagan taqdirda, u jarimaning qolgan qismini to‘lashdan ozod qilinishi tushuntirilmoqda.
Kadastr agentligi viloyat boshqarmasi, uning tuman, shahar bo‘limlari mutaxassislari tomonidan yerdan foydalanish bo‘yicha o‘rganishlar davom etmoqda.
UzA maqolasi
